Cerdd Yr Awr Gymraeg

Yr Awr Gymraeg

 

Mae ’na awr sy’n mynnu erwau y we’n

wyrth o drydariadau,

lle i’n cân gael llenwi cae’n

hen go’ a hawlia gaeau.

 

Awr Gymraeg a’i muriau hi’n ehangu

rhag angau, a geni

wna’r awr hon ru â’i hynni

newydd yw’r welydd ’weli.

 

Â’r heniaith ar ei hunion, â’r alwad

ar hewl o orwelion

i lannau diffiniau y ffôn

yn seiat o negeseuon.

 

Awr ein hiaith yn rhannu o hyd, awr rhoi

ac awr yw i gymryd,

awr boeth yw awr orau’r byd,

awr o haf yw’r awr hefyd.

 

–  Aneirin Karadog

 

 

Cyhoeddwyd yn wreiddiol ar wefan Llenyddiaeth Cymru fel rhan o Her 100 Cerdd

http://www.llenyddiaethcymru.org/lw-blog/100-cerdd-9/

Leave a Reply

Your e-mail address will not be published. Required fields are marked *